Bya Ssemakula John
Kampala
Gavumenti eragidde emikutu gy’amawulire gyonna mu ggwanga okwewala okuteeka ku mpewo bannabyabufuzi abambadde obukoofiira obufaanana obw’amagye.
Obukoofiira buno okusinga bwambalwa ab’ekisinde kya People Power n’ekibiina kya National Unity Platform ekikulirwa Omubaka Robert Kyagulanyi (Bobi Wine).
Ekiragiro kino kyayisiddwa omwogezi wa gavumenti Ofwono Opondo mu nsisinkano gye yabaddemu n’ekibiina ekitaba emikutu gya ttivvi ne leediyo ekya National Association of Broadcasters (NAB) eggulo ku Lwokubiri, nga baasisinkanye ab’ekitongole ekikessi ekya CMI.
Ofwono yagambye nti obukoofiira bwonna obw’engeri eno bwawandiisibwa mu mateeka nga bulina kubeera bwa ggye lya UPDF era ng’omuntu yenna eyali takkiriziganya na kino, yalina okugenda mu kkooti esalewo eggoye naye olwokuba tewali yagendayo, okubeera nabwo kibeera kimenya mateeka.
Ono yalabudde omukutu gwonna ogunaalemerako okukyaza bannabyabufuzi abalina obukoofiira buno nti bajja kuba bamenya mateeka.
Ssentebe wa NAB, Kin Kariisa, yasabye ab’ebyokwerinda okukomya ebikolwa eby’obukambwe ku bannamawulire n’abagenyi ababeera bakyadde ku mikutu gino, mu kaseera kano ng’eggwanga lyetegerekera akalulu ka 2021.
Kinajjukirwa nti, Ssaabawandiisi wa National Unity Platform (NUP), Lewis Lubongoya yakwatiddwa ng’ava ku ttivvi ya NBS gyebuvuddeko, n’aggulwako omusango gw’okwambala akakoofiira akafaanana ak’amagye.
Era nga waliwo n’abawagizi ba NUP abaakwatiddwa nebasindikibwa ku alimanda olw’okusangibwa n’obukoofiira buno.