Bya Betty Namawanda
Kyotera
Abantu b’enjawulo naddala bannabyabufuzi mu Kyotera bakukkulumidde gavumenti olw’okulemwa okusindika omubaka mu kuziika kw’eyali omubaka w’essaza lya Kyotera, Pius Mujuzi, afiiridde ku myaka 59.
Abakungubazi bano bagamba nti kino kyabadde kikyamu. Mujuzi eyaziikiddwa eggulo mu makaage e Kisunku mu Kyotera. Bagamba nti ono abadde muntu munene nnyo mu ggwanga.
Bano nga bakulembeddwamu Ssentebe wa disitulikiti y’e Kyotera, Patrick Kintu Kisekulo, Josephine Nabakooza, n’abalala, bagamba nti teyandibadde Gavumenti okulemererwa okusindika omukungubazi yenna wadde okwetaba mu nteekateeka z’okuziika omuntu waabwe.
Bagamba Mujuzi eyaliko omuwandiisi wa Pulezidenti Museveni oweekyama ku nsonga z’amagye, eyaliko omubaka w’essaza ly’e Kyotera mu Palamenti okumala emyaka 10 era nga yaliko RDC
Kasese okumala ebbanga ekiraga nti abadde muntu munene mu ggwanga.
Abakungubazi baategeezezza nti Mujuzi abadde akoleredde NRM ne Gavumenti, ebintu bingi era ng’abadde asaanidde okuziikibwa mu kitiibwa ekijjuvu.
Bo ababaka b’ekitundu kino nga bakuliddwamu omubaka w’essaza lya Kyotera, John Paul Lukwago Mpalanyi ne Fortunate Rose Nantongo, baasinzidde wano ne basaba abantu okwerinda ekirwadde kya Ssennyiga Corona.
Abooluganda lw’omugenzi nga bakulembeddwamu Ppookino eyawummula, Owek. Vicent Fererio Mayiga taata w’omugenzi omuto, Ssaalongo George William Lugemwa taata w’omugenzi ne Namwandu w’omugenzi Sarah Namisango Mujjuzi baategeezezza nti baviiriddwako omuntu owoomugaso mu famire.
Mu ngeri y’emu, akulira eddwaliro lya Kaliisizo Hospital, Dr. Richard Bantubalamu, alaze okutya olw’omuwendo gw’abantu abakwatibwa obulwadde bwa Covid-19, okweyongera mu disitulikiti eno.
Ye Rev. Fr. Joseph Ssemwanga bwannamukulu w’ekigo ky’e Matale eyakulembeddemu emmisa y’okusiibula omugenzi, yasabye abakulembeze abalondeddwa mu bifo eby’obukulembeze eby’enjawulo batwale eky’okulabirako Kya Lt. Pius Mujuzi nga baweereza abantu baleme kulowooza nti eby’obufuzi kubeera kwekkusa bokka.
Mu ngeri y’emu asabye abantu okwekuuma obulwadde bwa Covid-19 kubanga tebutaliza muntu yenna.