Bya Ssemakula John
Kampala
Ekitongole ekitwala eby’ebyenjigiriza ebyawaggulu akya ‘National Council for Higher Education (NCHE),’ kisabye abakulira amasomero n’amatendekero aga waggulu okuyimiriza entegeka zaabwe ez’okuggulawo olusoma olusooka olw’omwaka guno.
Bano basabiddwa okulinda ekiragiro kya Pulezidenti Yoweri Museveni ku nsonga eno, oluvannyuma lw’okuggala amasomero mu mwezi Gwokusatu mu 2020 ng’omu ku kaweefube w’okulwanyisa ekirwadde kya Ssennyiga Corona.
Wadde ng’abamu ku bayizi abali ku mutendera ogumaliriza ebibuuzo byabwe ku mitendera gyonna era nga tekimanyise ddi abayizi abalala lwe bagenda kudda ku ssomero.
Ng’ayita mu bbaluwa eyawandiikiddwa nga January 22, 2021 okuva ewa ssentebe wa NCHE, Prof. Mary Okwakol, abamyuka ba Ccansala mu matendekero aga waggulu basabiddwa okulindako okuggulawo eri abayizi abapya abalina okuyingira mu matendekero gano wamu nabo abasoma mu bibiina eby’enjawulo.
“Nga mwenna bwe mumanyi, okuggulawo okusoma eri amatendekero n’amasomero eri abamaliriza emisomo ku mitendera egy’enjawulo, lwaggulwawo Pulezidenti nga kwesigamizibwa ku byabulamu . Noolwekyo tulinze kiragiro kya gavumenti eri abayizi abalala,” Ebbaluwa ya Okwakol bw’esomye.
Bino we bijjidde nga ssettendekero wa Makerere yamalirizza entegeka eri abayizi abapya abeegasse ku ttendekero lino nga bano babadde baakutuukayo nga January 30, 2021.
Wabula Makerere yategeezezza nti kino bakikoze naye nga balinze ekisembayo okuva mu kakiiko ka NCHE ne gavumenti.
Makerere yategeezezza nti beetegefu okuggulawo akaseera konna era ng’ensonga y’ebyobulamu bagisosowaza nnyo okutangira ekirwadde kya Ssennyiga Corona.