Bya Jesse Lwanga
Mukono
Bannakibiina kya National Resistance Movement (NRM)abasisinkanye okutabagana, bakubaganye ebikonde n’okwesika ebitogi ng’entabwe eva ku bigambibwa nti waliwo oludda oluwagira abeesimbyewo ku lwabwe luleka abasimbiddwawo ekibiina.
Olukiiko luno lutuuziddwa ku Grand Prolos Gardens e Nasuuti, mu kibuga Mukono naye gye biggweeredde ng’abagenze okuteesa abamu banyiga biwundu.
Olukiiko luno olubadde lukubirizibwa Omubaka okuva ku kakiiko k’ekibiina ak’oku ntikko akamanyiddwa nga CEC, Kato Gabriel, lusoose kutambula bulungi.Kato ategeezezza bannakibiina nga bwe balina okwegatta era basonyiwagane ku ebyo ebitaagenda bulungi mu kamyufu k’ekibiina kibayambe okukolera awamu, baleetere ekibiina obuwanguzi.
Entabwe evudde ku yeesimbyewo ku ky’omubaka omukyala owa disitulikiti y’e Mukono ku kkaadi y’ekibiina, Nakavubu Margret, okulumiriza omubaka wa Mukono North era Minisita Ronald Kibuule, okugaana okumuwagira n’awagira atalina kibiina.
Wano abawagizi ba Minisita Kibuule batabuse n’aba Nakavubu ekizzeeko beegudde mu malaka nga buli ludda lulumiriza lunnaalwo enkwe n’obutaagaliza.
Kino kiwalirizza Omubaka wa Mukono South, Muyanja Ssenyonga okubawooyawooya naye n’ategeeza nti obuzibu buviira ddala ku bakulembeze b’ekibiina mu kitundu kino, abaleese emivuyo.
Wabula bino ssentebe wa NRM mu Mukono Central division, Livingstone Male, abisambazze n’ategeeza nti ensobi ebadde ku Nakavubu kuwalampa Minisita Kibuule atabadde mu Lukiiko luno kwewozaako.
Ate ye ssentebe wa NRM mu Mukono, Hajji Twahiri Ssebagala, asabye bannakibiina okukomya enkwe wamu n’olugambo kuba bino bye bisinze okutabula ekibiina kyabwe.
Omubaka wa Pulezidenti e Mukono, Fred Bamwine ategeezezza nti okusookera ddala olukiiko luno lwatuuziddwa mu bukyamu era nga tewabaddewo wa byakwerinda kutangira kwegwa mu malaka, n’awera obutaddamu kukkiriza bikolwa bya kika kino mu kitundu kye.