Bya Maria Gorreth Namisagga
Mmengo – Kyaddondo
Bannakibiina ki National Unity Platform nga bakulembeddwamu omukulembeze w’ekibiina kino era nga y’akikwatidde bendera ku bukulembeze bw’eggwanga, Robert Kyagulanyi Ssentamu, bakyaddeko embuga mu Bulange e Mengo.Bano
Bano olutuuse basoose kwevumba kafubo mu kkakkalbizo lya Katikkiro, oluvannyuma ne bafuluma mu luggya lwa Bulange.
Katikkiro wa Buganda munnamateeka Charles Peter Mayiga bw’abadde ayogerako eri bannakibiina kino, azzeemu okukikaatirizanti oluggi lwa Bulange luggule eri buli muntu ayagala okugenda okukiika Embuga, kasita omuntu oyo abeera nga assa ekitiibwa mu Bwakabaka era ng’akitegeera nti Kabaka y’ali ku ntikko mu Buganda.
Kamalabyonna, bano abajjukizza obukulu bw’Ensonga za Buganda Ssemasonga Ettaano (5), nga zino agamba ze zinnyonnyola amakulu g’ekigambo ‘ebyaffe’ abakubye akaama nti singa zino banaazigobeerera , abantu bajja kubaagala nnyo.
“Buli munnabyabufuzi atukyalira tumujjukiza Ensonga za Buganda Ssemasonga Ettaano okuli; okutaasa okukuuma n’okunyweza Nnamulondo, Okugabana obuyinza mu nkola eya Federo, Okukuuma Ettaka n’ensalo za Buganda, okukola obutaweera, n’Obumu, zino mbasaba muzikuume butiriibiri, abantu bajja kubaagala nga muzikoze” Katikkiro Mayiga.
Owoomumbuga abeebaziza okutambulanga ne bendera ya Uganda, era n’abasaba okwongera okukuza omwoyo gw’obwasseruganda mu bantu ba Uganda, ng’annyonnyola nti bannayuganda baagalana nnyo newankubadde waliwo abaagala baawukane naye bbo beeyagala nnyo kubanga bonna ebizibu ebibaluma kumpi bye bimu.
Owek. Mayiga asinzidde wano n’asaba abavubuka okwegendereza engeri gye basengekamu bye boogera, kubanga ebimu ng’agamba nti singa tebasengejja ebimu kw’ebyo bye boogera byanndibafiiriza emyaka gyabwe emirala mu maaso ng’abantu bajuliza ebyo bye baayogera, abajjukiza nti omutimbagano tegwerabira.
Hon. Robert Kyagulanyi Ssentamu, akulira National Unity Platform, era nga y’agikwatidde bendera ku bukulembeze bw’eggwanga, yebazizza Katikkiro olw’okubaanirizanga embuga era n’amukulisa n’okuggusa omulimu gw’okumaliriza eddimu eddene ery’okuzzaawo amasiro ga ba Ssekabaka e Kasubi.
Kyagulanyi ategeezeza nti ensonga enkulu ebaleese Embuga kwe kuloopa olutabaalo lwe baliko olw’okununula eggwanga, ono era ategeezeza nti bajja kusigala nga bawulize eri Obwakabaka, bwatyo n’asaba Katikkiro abatuusize obubaka eri Ssaabasajja, nti bamwagala nnyo era bamalirivu okukuuma Nnamulondo nga bajjajja abasooka.
Ye Omwogezi w’ekibiina kino era nga yakulira oludda oluvuganya Gavumenti mu palamenti Hon. Joel Ssenyonyi , agambye nti ensonga za Buganda okuweebwa ensimbi z’ebanja Gavumenti eya wakati bakyajiriko era tebajja okugivaako okutuusa ng’ekoleddwako, ono aloopedde Katikkiro embeera gye bayitamu mu kunonya akalulu omuli abawagizi naddala okukwatibwa ne basibwa nga n’abamu ku bbo balemeseddwa okuyingira Bulange leero.
Katikkiro mu nsisinkano eno aweerekeddwako ba Minisita ba Kabaka; Israel Kazibwe Kitooke, Mariam Nkalubo Mayanj, Noah Kiyimba, Choltilda Nakate n’abakungu abalala ate bbo banna-NUP, babaddewo n’abakulembeze ab’enjawulo mu kibiina n’abakwatidde ekibiina bendera ku bifo eby’enjawulo.