Mmengo – Kyaddondo
Bya Ronald Mukasa
Abavubuka abeegatira mu kibiina Buganda Kwe kwaffe nga bakulembeddwamu Ssentebe waabwe Kyazze Bashir balabudde Minisita omubeezi ow’ebyetakka Sam Mayanja okukomya mbagirawo okulumbagana nokutyoboola Ssaabasajja kabaka Ronald Muwenda Mutebi II oba sikyo, bakukolawo akatiisa.
Bano okwogera bino kiddiridde ebigambo ebyayogerwa minisita Mayanja sabiiti ewedde bweyali asisinkanye abantu ba Beene mu Ssaza Kyaggwe ebyatyoboola ekitiibwa Kya Nnamulondo nebalabula nti singa tatta ku bigere, kyandyongera okusiikula abaganda emeeme nekiviirako abantu okutwalira amateeka mu ngalo.
Kyaze ajjukiza abantu ba Buganda okusingira dala abavubuka nti omulembe guno Beene yagukwasa bbo nga bagwanidde okusitukiramu okulwanirira n’okutaasa Nnamulondo nga benganga abantu abayisa olugaayu mu Maasomooji n’obwakabaka.
Ono era asabye omukulembeze w’eggwanga Yoweri Kaguta Museveni okuwummuza minisita Mayanja era akomye n’okulonda abantu abatyoboola Nnyinimu mubifo eby’obukulembeze kubanga bano beebakyaya gavumenti ye nobukulembeze bwe abantu ba Buganda.
Abavubuka bano bagasseeko nti Kabaka yentabiro yabuli kintu mu Buganda okuli n’etakka yensonga lwaki ye Ssaabataka era nebasaba minisita ono okwongera okwetegereza ebyafaayo nokunoonyereza ku nkomerero yaabo abazze abatyoboola n’okuvvoola Kabaka .
Ye Nnaalongo Ssewakiryanga yeebazizza abantu ba Beene abasituse nebaabulira olukungaana olwakubiddwa minisita ono nategeeza nti eno yeemu ku ngeri esobola okuyitwamu okulwanyisa abantu abayisa olugaayu mu Nnamulondo bwatyo nakunga Obuganda bwonna okuba ne ddoboozi limu bwekituuka mukwenganga abatyoboola Nnyinimu.
Munnakibiina Buganda Kwekwaffe, Ssimbwa Charles akubirizza Obuganda obutattira kuliiso muntu yenna yeesomye kutyoboola Kabaka wabula bavengayo bengange omuntu oyo okusobola okussa ekkomo ku bikolwa bino.