Bya Ssemakula John
Kampala
KABAKA Ronald Muwenda Mutebi II akungubagidde musajja we, Owek. Joseph Nsambu Musisi eyafudde obulwadde bwa Ssennyiga Corona era nga yaliko omubaka we mu Bungereza ne Northern Ireland.
“Tujjukira bulungi obuweereza bwe eri Nnamulondo obwali obw’ettendo okumalira ddala ebbanga eddene okusukka mu myaka 15 ng’aweereza mu biti eby’enjawulo n’okusingira ddala bwe yali omubaka wa Kabaka e Bungereza ne Northern Ireland.
Emirimu gye ng’omubaka yagikola mu bumalirivu n’obuvumu awatali kutiirira Nnamulondo ate mu ngeri eweesa Obwakabaka ekitiibwa.” Obubaka bwa Kabaka eri Nnamwandu Sarah Nsambu Musisi bwe busomye.
Obubaka buno, Katikkiro Charles Peter Mayiga yabutuusizza mu kusabira omwoyo gw’omugenzi mu Eklezia ya Our Lady Of Mount Carmel e Kansanga.
Empologoma era esaasidde famire yonna n’abantu ba Buganda abawangaalira e Bungereza ne Northern Ireland, olw’okufa kw’omuntu abadde abagumya.
Ku lulwe, Katikkiro Mayiga atenderezza omugenzi ng’omusajja abadde ayagala ennyo abantu era akola obutaweera.
Owek. Joseph Nsambu Musisi waakuziikibwa Gomba olunaku lwenkya ku Lwokutaano. Okusaba kwetabiddwamu Nnaabagereka Sylvia Nagginda, Minisita Hillary Onek n’abakungu ba Kabaka n’ebikonge okuva mu gavumenti yaawakati.