Bya URN
Omukulembeze w’eggwanga Yoweri Kaguta Museveni enkya ku lw’okusatu abadde agenda kw’ogerako eri eggwanga okulitegeeza enteekateekaye mu kulwanyisa ssenyiga wa Coronavirus.
Abadde ayise Bannamawulire ab’enjawulo mu makage Entebbe okubannyonnyola kyokka omwogeziwe, Linda Nabusayi eyabadde asabye abakulire emikutu ej’enjawulo okumuwa amannya gabo banaagenda mu State House Entebbe abisazizzaamu ng’agamba eb’ebyobulamu bakiganye.
Ategeezezza nti minisitule y’eby’obulamu yaganye abantu okukungaana nga kino kyekiviirako akawuka kano okusaasaana.
Nabusayi yagambye nti okw’ogera kw’omukulembeze kwakukolebwa ekitongole ekikola ku byamawulire mu makage era bano abanaayagala okuwandiika ku biki byagambye gyebajja okubisanga.
Ekirwadde kino ekisaasanidde ensi yonna kyasooka mu China ku nkomerero y’omwaka oguwedde.
Abantu 170,000 kati bekyakayoola munsi yonna nga n’abalala 7000 baamaze dda okulugulamu obulamu.