Moroto
Oluvanyuma lw’ abasibe abasoba mu 200 okutoloka mu kkomera lye Moroto eggulo ku ssaawa 10 nebagenda n’ emmundu ezisoba mu 15, leero amajje gategeezezza nga basatu ku bano bwebattiddwa ate musanvu nebakwatibwa era nebakomezebwawo mu kkomera lino.
Omwogezi w’ekibinja ky’amajje eky’okusatu Maj. Peter Mugisa yategeezezza nti, bano battiddwa mukuwanyisiganya kw’ amasai wakati wabwe n’abebyokwerinda ababadde babawondera mu nsozi ze Moroto gyebaddukidde.
Mugisha yanyonyodde nti abasibe 7 bbo basobodde okukwatibwa era nga bakyali ku muyiggo gw’abalala.
Omwogezi w’amajje Brig. Gen Flavia Byekwaso yategeezezza nti, ekiro ky’eggulo omu ku bajaasi ba UPDF naye yafiiridde mu kuwanyisiganya amasasi n’abasibe bano.
Akulira ekitongole ky’ amakomera mukitundu kino, Sam Edotu yanyonyodde nti, mu bwangu bagenda kufulumya alipoota ku mbeera eriwo era nga bakyali ku muyiggo gw’abasibe bano kubanga ba bulabe.
Abamu ku basirikale b’amakomera abatayagadde kwatuukirizibwa mmanya bategeezezza nti, abasinga ku basibe bano abatolose basibwa ku misango gya Nagomola era nga abamu babadde baakaleetebwa mu mwezi oguwedde.
Olunaku lw’eggulo okwesoozza kw’amasasi kwabuutikidde ttawuni ye Moroto okumala eddakiika 30 malamba nga amajje, poliisi n’abamakomera bagezaako okukwata abasibe bano, ekyasanyalaza emirimu mukitundu kino.
Waliwo n’ennyonyi za UPDF bbiri ezaalabiddwako nga zirawuna olusozi lwe Moroto abasibe gye bagambibwa okuddukira.
URN